LabTap (லப் டப்) - the heart beat of an empty vessel

உதிர் இலைகள்

2010-12-29T22:25:00.000-08:00

இதமாய் தவழ்ந்திடும் காற்றோடு
நிதானமாய் உரையாடும் இலைகள்

நிலையாய் நிற்காமல்
கட்டற்று திரியும் வாழ்க்கை
எத்தனை அழகென்று
இலைகள் கேட்கும் கேள்விக்கு
காற்று பதில் தருவதில்லை

காற்றின் புதிரான மௌனத்திற்கு
அர்த்தம் தேடி
தங்களுக்குள் சலசலத்து
குறுகுறுப்பாய் ஆராயும்

நுனிக் கிளையில் சிறைபட்டு வாழும்
துக்கத்தின் கண்ணீரை
பனித்துளிகளுக்குள் மறைத்திடும்
பெரும்பாலும்

கடைசியாய் பார்த்தபொழுது
தன்னையும் அதனோடு கூட்டிச்செல்லுமாறு
தரையோடு புரண்டு
காற்றோடு மன்றாடிக்கொண்டிருந்தது
காய்ந்து உதிர்ந்த ஒர் இலை

தொடுகோடுகள்*

2010-01-14T01:50:00.000-08:00

எங்கெங்கோ தொடங்கிய
என் வாழ்க்கையும்
உன் வாழ்க்கையும்
ஒருப் புள்ளியில் மட்டும்
சந்தித்து விலகுமென
யார் அறிந்திருப்பார்?
வாழ்க்கைப் பாதையை
வரைந்தவனைத் தவிர !

எங்கோ தொடங்கி
மெல்ல நெருங்கி
ஒருப் புள்ளியானாலும்
மனதின் உயிர்ப் புள்ளியைத் தொட்டு
பின் உதறி விலகிடும்
சந்திப்புகளின் அர்த்தம்
சிந்தித்தாலும் புரிவதில்லை !

-------------------
*தொடுகோடு = Tangent. It touches a curve at only one point

உரையாடல் கவிதை போட்டிக்காக...

உண்மை தேடல்

2009-02-12T23:00:00.000-08:00

ஏதேதோ தேடி அலைந்திருந்த மனம்
பேராசை கொண்ட ஒரு நாள்
உண்மையைத் தேடத் துணிந்தது

தேடியலைந்த நான்
உண்மையென தன்னை அறிவித்த ஒன்றை
பற்றிக்கொண்டேன்

உண்மையைப் பற்றிக்கொண்டிருக்கும்
என் கைகள் தளரக்கூடும்
உண்மை நித்யம் நிலைக்கும்
என நினைத்திருந்தேன்

ஆனால் பற்றியிருந்த உண்மையின் பரப்புகளில்
சுருக்கங்கள் விழுந்த பொழுது
ஏமாற்றத்திற்கு அளவில்லை
பிறிதொன்றைப் பற்றும்வரை

உண்மை என நேற்று நினைத்தவைகள்
நீர்த் திரை பிம்பகளினும் வேகமாய்
உருமாறுவதைக் கண்டு
இன்று பற்றிக்கொண்டிருப்பவைகளின் மேல்
சந்தேக விரிசல்கள்

கணக்கற்ற முறை தேடித்தேடி
தேடல் மட்டுமே உண்மை என உணர்ந்த பின்
தேட முடியும் வரை
தேடுவதாய் முடிவு செய்துள்ளேன்

ஆனால் எதைத் தேடுவது?

PiT போட்டிக்காக - The Lazy Trinity

2008-08-15T10:51:00.001-07:00

The Lazy Trinity

இது வரைக்கும் PiT போட்டில வெற்றி பெறல.
இந்த ஆமைகளாவது போட்டில முன்னாடி வருதான்னு பார்க்கலாம் !!!

யந்திர ரகசியம்

2008-07-27T14:52:00.000-07:00

(சிறில் அவர்கள் நடத்தும் அறிவியல்-கதை போட்டிக்காக)

முன் கு*ப்பு:

மக்களே, இது என் முதல் கதை முயற்சி. உங்கள் எண்ணங்களை சொல்லிச்சென்றால் எனக்கும் உற்சாகமாக இருக்கும்.

காலம்: கிபி 2445

”ரோபோ என்னும் யந்திர மனிதனை எப்படி துன்புறுத்துவது? அது சேமித்து வைத்துள்ள ரகசியங்களை எப்படி பெறுவது?மனிதனை துன்புறுத்துவதென்றால் எளிது. உடலளவில் துன்புறுத்தியோ இல்லை மனதளவில் மிரட்டியோ ரகசியங்களைப் பெறலாம்.இல்லை ஆசை காட்டியேனும் ரகசியங்ளைப் பெறலாம். உடலிலோ மனதிலோ உணர்ச்சிகளும், ஆசைகளுமற்ற ஒரு யந்திர மனிதனை எப்படி துன்புறுத்தி ரகசியங்களைப் பெறுவது?” இவைதான் மனிதகுலத்தின் தலை சிறந்த விஞ்ஞானியான இனியனின் மனதை தற்பொழுது அரித்துக்கொண்டிருக்கும் கேள்விகள். ”இந்தக் கேடு கெட்ட ஆறாம் உலகப் போரால் ஒரு விஞ்ஞானியான நான் இப்படியெல்லாம் கீழ்த்தரமாக சிந்திக்க வேண்டியுள்ளதே” என தன்னைத்தானே நொந்துகொண்டார் இனியன்.

இனியனுக்கு இந்தக் கேள்விகளுக்கான பதில் ஏன் தேவையென உங்களுக்குத் தெரியாதல்லவா?. 21ஆம் நூற்றாண்டில் இருக்கும் உங்களுக்கு 25ஆம் நூற்றாண்டில் மனிதகுலம் சந்தித்து வரும் பிரச்சனைகளைப் பற்றி தெரிந்திருக்க வாய்ப்பில்லை. 20ஆம் நூற்றாண்டில் ”ரோபோ” என்றால் என்ன என பத்தில் ஒருவருக்கு தெரிந்திருந்த நிலை மாறி, 21ஆம் நூற்றாண்டில் மனிதன் செய்ய தயங்கிய வேலைகளை செய்வதற்கு ஆரம்பித்து, 22ஆம் நூற்றாண்டில் சுயமாக சிந்திக்கும் திறமை பெற்றன இந்த யந்திரன்கள். 24ஆம் நூற்றாண்டின் தொடக்கத்தில் யந்திரன்களின் அறிவாற்றல் மனித விஞ்ஞானிகளின் அளவிற்கு உயர்ந்தது. பின்பு யந்திர-விஞ்ஞானிகள் உருவாகி, சுயமாக ஆராய்ச்சி செய்யும் அளவிற்கு சிந்தனை ஆற்றல் பெற்றன. 25ஆம் நூற்றாண்டில் திடீரென ஒரு நாள் (ஜூலை 31, கி.பி 2425) உலகில் உள்ள பல ராணுவ நிலைகளை இந்த யந்திரன்கள் ஆக்கிரமித்துக்கொண்டு மனிதனுக்கெதிராக போரைத் தொடங்கின. மனிதகுலம் பேரழிவை சந்திக்கத் தொடங்கியது. யந்திரன்களால் கைப்பற்றப்படாத ராணுவ நிலைகளை வைத்துக்கொண்டு அழிவிலிருந்து தன்னைக் காத்துக்கொள்ள கடைசி முயற்சியில் ஈடுபட்டுள்ளது மனித இனம். இந்நிலையில்தான், யந்திர படையின் முக்கிய தளபதிகளில் மூன்று, ஒரு வாரத்திற்கு முன்பு மக்கள் படையிடம் சிக்கின. அந்த தளபதி யந்திரன்கள் அணைத்தும் மற்ற யந்திர-விஞ்ஞானிகளால் வடிவமைக்கப்பட்டவை. அவற்றின் வடிவு (design) பற்றி மனித-விஞ்ஞானிகளுக்கு அவ்வளவு தெரியாது.

அந்த தளபதி யந்திரங்களின் மூளையில் ஆயிரமாயிரம் ராணுவ ரகசியங்கள் குவிந்துள்ளன. எங்கே யந்திரங்களின் கட்டளைத்தளம் உள்ளது? எங்கெங்கு யந்திர ஒற்றர்கள் உள்ளனர்? அவர்களின் அடுத்த இலக்கு எது? போன்ற ரகசியங்கள். அந்த ரகசியங்களை தெரிந்துகொண்டால் மனிதகுலத்தின் வெற்றி வாய்ப்பு உறுதியென்றே சொல்லலாம். ஆனால் அந்த யந்திர மனிதர்களிடமிருந்து எப்படி ரகசியங்களைப் பெறுவது? அதற்காகத்தான், பிடிபட்ட யந்திர மனிதர்களை அத்துறையின் வல்லுனரான இனியனிடம் ஒப்படைத்துள்ளனர். அந்த யந்திரன்களின் ஞாபக பெட்டகங்கள்
சிலிக்கோ-கார்பன் சில்லுகளாக இருந்தன. ஒரு யந்திரனின் ஞாபக பெட்டகத்தைத் திறந்து உள்ளிருப்பதை படிக்க முயற்சி செய்த பொழுது அந்த யந்திரன் வெடித்து தன்னைத்தானே சிதைத்துக்கொண்டது. நல்ல வேளையாக ஆராய்ச்சிக் கூடத்தில் உயிர் இழப்புகள் ஏதுமில்லை.

”ஏன் யந்திரன்கள் பிடிபட்டபொழுதே வெடிக்கவில்லை? ஏன் ஞாபக பெட்டகத்தை திறக்க முயலும் பொழுது மட்டும் வெடிக்கிறது?” என இனியன் குழம்பிப் போனார். அப்பொழுது ஒரு தொலைத் தொடர்பு உதவியாளர் பதட்டத்தோடு ஓடி வந்தார். யந்திரன்கள் ரேடியோ அலைகள் மூலம் தங்களுக்குள் பேசிக்கொள்வதை ஒட்டுக்கேட்கும் பிரிவைச் சேர்ந்தவர் அவர். “வெடித்த யந்திரன், நமது ஆராய்ச்சி கூடத்தில் பார்த்த அத்தனையும் படங்களாக மாற்றி தன்னுடைய கட்டுப்பாட்டு நிலையத்திற்கு ரேடியோ அலைவரிசையில் அனுப்பிய பின்னரே வெடித்தது” என சொல்லவும் அதிர்ச்சியடைந்தார் இனியன். இந்த யந்திரன்கள் முடிந்த அளவு மனிதர்களின் ரகசியங்களை தெரிந்துகொள்கின்றன, ஆனால் அவற்றின் ரகசியங்களை தெரிந்துகொள்ள முயலுகையில் மட்டும் தங்களை சிதைத்துக்கொள்கின்றன என உணர்ந்தார் இனியன். யந்திரன்களை திறக்க முடியாது, துன்புறுத்த முடியுமா? எப்படி யந்திரன்களிடமிருந்து ரகசியங்களைப் பெறுவது? என அலையலையாய் கேள்விகள் அவரது மனதில். அந்தக் கேள்விகளை சுமந்தபடியே சோர்ந்து போய் வீடு திரும்பினார் இனியன்.

வீட்டில் அவரது மனைவி நிலா அவருக்காக காத்திருந்து உறங்கிப்போயிருந்தாள். அவரும், உணவு உண்ட பின் சோர்வில் உறங்கிப்போனார்.அதிகாலை இனியன் அரைத்தூக்கத்தில் புரண்டுகொண்டிருந்தார். நிலா அவர்களது குழந்தைகளை பள்ளிக்கு ஆயத்தப்படுத்திக்கொண்டிருந்தாள். நிலாவிடம் குழந்தைகள் படுகையறையிலிருந்து எதையோ எடுத்துத் தர சொல்லி நச்சரித்துக்கொண்டிருந்தனர். சமையலறையிலிருந்த நிலா அவர்களிடம் “எனக்கு இரண்டு கைகள்தான் இருக்கிறது, இங்கே இருக்கிற வேலைகளை முடித்துவிட்டுத்தான் அங்கே வர முடியும்” எனக் கூறினாள்.அது இனியனின் காதுகளில் விழுந்தது. அவருக்குள் ஏதோ ஒரு நெருடல்.”இங்கே இருக்கிற வேலைகளை முடித்துவிட்டுத்தான் அங்கே வர முடியும்” என்ற வார்த்தைகள் அரைத்தூக்கத்தில் திரும்பத் திரும்ப அவர் மனதில் ஓடியது. யந்திரகளின் ஞாபகப்பெட்டகத்தை உடைக்க ஒரு திட்டம் திடீரென அவரது மனதில் தோன்றியது. விருட்டென எழுந்த இனியன் உணவருந்தாமலே
தனது ஆராய்ச்சிக்கூடத்திற்கு அவசரமாக ஓடினார்.

யந்திரன்களை வேறொரு அறையில் பூட்டி விட்டு, உதவியாளர்களை தனது அறைக்கு அழைத்து அவரின் திட்டத்தை விவரிக்கத்தொடங்கினார். ”ஒரு யந்திரனின் மூளையாக செயல்படுவது ஒரு சக்திவாய்ந்த Processor. அதன் ”ஞாபகம்” அல்லது மெமரி மிகவும் பெரிது. இவையிரண்டையும் நாம் பிரித்துப்பார்க்க நினைத்தோம். ஆனால் அப்படி செய்ய முயற்சித்தால், இந்த யந்திரன் தன்னையே சிதைத்துக்கொள்ளும்படி வடிவமைக்கப்பட்டிருக்கிறது. நாம் அதன் மூளையையோ, மெமரியையோ, வெடியையோ தொடுவதை உணர்ந்து வெடிக்க சில நேனோநொடிகளே எடுத்துக்கொள்கிறது. அந்த குறுகிய நேரத்திற்குள் நம்மால் வெடிகளை செயலிழக்கச் செய்ய முடியாது. ஆனால்.... மனிதர்களைப்பற்றி ஏதேனும் ராணுவ ரகசியங்கள் தன்னிடம் இருந்தால் அதனை ரேடியோ அலைகளில் அனுப்பிவிட்டுத்தான் வெடிக்கிறது. .கடைசியாக வெடித்த யந்திரன் பத்து மில்லி செகண்டில் நமது ஆராய்ச்சிக்கூடத்தில் பார்த்தது அத்தனையையும் அனுப்பிவிட்டது. அந்த பத்து மில்லி செகண்டில் ஒரு சில மெகாபைட் அளவு செய்திகளை அனுப்பியுள்ளது. அந்த யந்திரனிடம் அனுப்புவதற்கு நிறைய செய்திகள் இருந்தால், அந்த பத்து மில்லி செகண்ட் என்பது சில நொடிகளாக நீளும். அதுவரை அது வெடிக்கும் நேரம் தள்ளிப்போடப்படும். காரணம், செய்தி அனுப்பும் வேலைகளை முடித்துவிட்டுத்தான் வெடித்துச்சிதையும் வேலை Processor செயல்படுத்தும்.அதாவது the self-destruct process will be enqueued in wait state till the transmit process is finished.

ரேடியோ அலைவரிசையில் அனுப்ப பத்து நொடிகளாவது தேவைப்படும் அளவு நம்முடைய ஆயிரக்கணக்கான ராணுவ ரகசியங்களை யந்திரனுக்கு காட்ட வேண்டும். அந்த பத்து வினாடிகளில் நம்மால் யந்திரனைத் திறந்து உள்ளிருக்கும் வெடிகளை நீக்கிட முடியும். வெடிக்க வைக்கும் சர்க்யூட்டுகள் trigger ஆனாலும், வெடிகள் இல்லாததால் யந்திரன் சிதையாது, நாமும் ரகசியங்களைப் படித்திடலாம்” என்று இனியன் சொன்னவுடன், எல்லோருக்கும் உற்சாகம் தொற்றிக்கொண்டது. பரபரப்புடனும் ஏற்பாடுகளை செய்யத்துவங்கினர். ஒரு மிகப்பெரிய திரையில் மனிதர்களின் ராணுவ ரகசியங்கள் அடங்கிய படக்காட்சிகள் காட்டுவதாக முடிவு செய்யப்பட்டது.

யந்திரன் தான் பார்ப்பதை Live ஆக உடனுக்குடன் அனுப்பிடாமல் இருப்பதற்காக ரேடியோ அலைகள் நுழையாத ஒரு அறைக்குள் வைக்கப்பட்டது. அங்கே ஒரு மிகப்பெரிய திரையில் மனிதர்களின் ராணுவ ரகசியங்கள் அடங்கிய படக்காட்சிகள் ஓடத்தொடங்கியது. சில மணிநேரங்கள் கழித்து அந்த அறையின் கதவுகள் திறக்கப்பட்டது. அப்பொழுதுதானே யந்திரன் தான் பார்த்தவற்றை ரேடியோ அலைகளால் தன்னுடைய கட்டுப்பாட்டு நிலையத்திற்கு அனுப்ப முடியும். சரியாக அந்த கணத்தில் இனியன் வேகமாக செயல்படத் துவங்கினார். அந்த யந்திரனின் மூளையும், வெடிகளும் இருக்கும் மார்புப் பகுதியை திறந்தார். பின் அடுத்த வினாடி கையிலிருந்த லேசர் கத்தி மூலம் வெடிகளுக்குச் செல்லும் மின் இணைப்பை துண்டித்தார். அந்த சில வினாடிகளில் அவரின் இதயத்துடிப்பு பல மடங்கு ஏறியிருந்தது. உள்ளங்கைகளும், நெற்றியும் வேர்த்துக் கொட்டியிருந்தது. வெற்றிகரமாக நீக்கப்பட்ட வெடிகளை உயர்த்திக்காட்டினார் இனியன். ஆராய்ச்சிக்கூடத்திலிருந்த அனைவரும் எழுந்து நின்று கைதட்டினர்.

ஒரு உதவியாளர் கவலையோடு “நம்முடைய சில ரகசியங்களாவது இந்த யந்திரன் அனுப்பியிருப்பானே?” என கேட்கவும், இனியன் புன்னகைத்தபடி ”கவலைப்படாதே, நான் திரையில் காட்டியதெல்லாம் கற்கால ராணுவ ரகசியங்கள். எல்லாம் பல நூற்றாண்டுகளுக்கு முன்பு மூன்றாம் உலகப்போரில் உபயோகப்படுத்தப்பட்டவை” என்றார். யந்திரனின் மூளையிலும், மெமரியிலும் உள்ள ரகசியங்கள் சிறிது சிறிதாக வெளிவரத்துவங்கியது.இனி வெற்றி நிச்சயம் என அனைவருக்கும் புது நம்பிக்கை தோன்றியது.

மனமெல்லாம் மகிழ்ச்சியோடு வீடு திரும்பினார் இனியன். ”நல்ல யோசனையொன்று தந்தாய் நீ” என்றபடி கண்சிமிட்டிய கணவனை புரியாமல் பார்த்தாள் நிலா.

பி.கு:(எல்லா அறி-புனைகளிலும்(Sci-fi) மனிதனே வெல்வதுபோல் எழுதினாலும், உண்மையில் எதிர்காலத்தில் என்ன நடக்கும் யாருக்குத்தெரியும்? :) )

கூகிளின் தமிழ் செய்தி சேவை

2008-07-23T13:20:00.000-07:00

மக்களே,
கூகிள் தற்பொழுது தமிழிலும் செய்திகள் தர துவங்கியுள்ளது.
பார்க்க: http://news.google.com/news?ned=ta_in
(தமிழ்செய்தியா? இல்ல தமிழ்ச்செய்தியா? தெரிஞ்சவங்க சொல்லுங்கப்பா)

சோம்பேறிதனத்தின் உச்சகட்டம் :)

2008-07-19T13:21:00.000-07:00

Height of Laziness !!!

செய்யும் தொழிலே தெய்வம் - PiT போட்டிக்காக

2008-06-12T00:10:00.000-07:00

((படத்தை க்ளினால், பெரிய படம் பார்க்கலாம்.))

PiT போட்டிக்காக முதலில் அனுப்பிய படம் தலைப்புக்கு அவ்வளவு பொருத்தமில்லை என்பதால் போட்டியிலிருந்து அதனை எடுத்துவிட்டு, இந்தப் படத்தை போட்டிக்கு அனுப்புகிறேன். ஆக்ஸிஜென் முகமூடி போட்டுக்கொண்டு இவர் செய்யும் வேலைகள் :
1) மீன்களுக்கு உணவளிப்பது,
2) மீன்தொட்டியை கழுவது

(இந்த மீன் தொட்டிகள் 3 மாடிகள் உயரம் கொண்டவை.
இடம்:Monterey Bay Aquarium, Califonia.
குறைவான வெளிச்சத்தில் எடுத்தது, அதனால் படத்தின் தரம் எதிர்பார்த்த அளவு இல்லை. )

PiT போட்டிக்காக

2008-06-03T23:54:00.000-07:00

PiT போட்டிக்காக:
(Click on the image to see larger picture )
1) அணிலின் தொழில் பழம் தேடி உண்பது

2) குழந்தையின் தொழில்? வேறென்ன, விளையாட்டுதான்...

உங்கள் கருத்துக்களை சொல்லிச் செல்லுங்கள் !

மௌனம்

2008-04-18T18:33:00.000-07:00

சத்தங்களும் சுமையாகிப் போன ஒரு பொழுதில்
நீ என்னைக் காண வந்தாய்
அமைதியை விரும்பிய என் எண்ணத்தை
கண்டுகொண்டாய் நீ
அது எனக்கு பிடித்திருந்தது

புன்னகையோடு என் அருகே அமர்ந்தாய்
என் மௌனத்தோடு கலந்தது உன் மௌனம்
அதுவரை விரும்பிய அமைதியை விட
விருப்பமாகிப் போனாய் நீயெனக்கு

அழகிய காட்சி - "ரன்" படத்திலிருந்து

2008-01-07T12:44:00.000-08:00

ஒரு அணிலின் எண்ணங்கள்

2007-12-28T23:14:00.000-08:00

நான் படிக்கிற பல்கலைக்கழகத்தில் நிறைய அணில்கள் மேயும். புது கேமரா வாங்கின ஆர்வத்தில் படம் பிடிக்கிறேன்னு சொல்லி, ஆர்வக்கோளாறில் ஒரு அணிலை தொந்தரவு பண்ணினதுல, அந்த அணில் டென்ஷனாகி மனசுல என்ன நினைச்சுதுன்னு பாருங்க.

( பிடிச்சிருந்தா ஏதாவது சொல்லிட்டு போங்க மக்களே )

பயணம்

2007-11-18T22:25:00.000-08:00

பாதங்கள் பட்டு புற்கள் மடிந்தத் தடம்
ஒற்றையடிப் பாதையானது

என் ஹெல்மெட் கண்ணாடியில் பட்டு
சிதறியதுண்டு ஒரு பட்டாம்பூச்சி

பதிந்த என் காலடித் தடத்தில் கண்டதுண்டு
சில நசுங்கிய நத்தைக்கூடுகளை

பயணமென்பது திசைகளும் பாதைகளும் மட்டுமல்ல
சில மரணங்களும்தான்

Website Name in Tamil alphabets

2007-10-12T16:07:00.001-07:00

http://timesofindia.indiatimes.com/Roman_alphabet_to_lose_hold_on_net/articleshow/2453996.cms

என் கடவுள்

2007-06-22T06:38:00.001-07:00

கடவுள் என்பது வானம் போல.
பார்க்கையில் இருப்பது போல தோன்றும்.
ஆராய்ந்து பார்த்தால் உண்மையில்
அப்படி ஏதும் கிடையாது என்று புரியும்.
இருக்கிறது என்று நினைத்துக்கொண்டால்
பல விசயங்கள் எளிதாகிவிடும்.

கோவை பதிவுப் பட்டறையும் ஒரு கத்துக்குட்டியும்

2007-05-22T06:49:00.000-07:00

பதிவுகளை பல காலம் படித்துக்கொண்டும், சில காலமாக இந்த கவிதைப் பதிவை எழுதிக்கொண்டுமிருக்கிறேன். இந்நிலையில் பதிவர் பட்டறை (Workshop) ஒன்றை என் சொந்த ஊர் கோவையில் 'தல' பாலபாரதி நடத்தினார். என்ன நடக்கிறதென்று பார்ப்போம் என சென்றேன். அந்தப் பட்டறையைப் பற்றி இந்த கத்துக்குட்டியின் குறிப்புகள்.

முதல் நிகழ்ச்சி:
சினிமா இசைத் துறையை சேர்ந்த திரு.ஆறுமுகம் அவர்களுடன் ஒரு நேர்க்கானல். பேட்டி எடுத்தவர் எழுத்தாளர் பாமரன் ( இவரின் இயற்பெயர் எழில்கோ)

ஆறுமுகம் சினிமா/இசைத்துறை பற்றி பேசியதில் சில கருத்துக்கள்:
1) தமிழக சினிமா 1930-40 களிலேயே இந்திய சினிமாவிற்கு முன்னோடியாக இருந்தது - இன்று கூட ஹிந்திப் படங்களுக்கு இருக்கும் பட்ஜெட்டில் பாதியாவது தமிழ் படங்களுக்கு இருந்தால் கண்டிப்பாக பாலிவுட்டை கோடம்பாக்கம் எளிதில் வென்றுவிடும் என்று நான் நினைக்கிறேன்.
2) இசையின் தரமும் பாடல் வரிகளின் தரமும் குறைந்து வருகிறது.
3) இசையமைப்பாளராக இருக்க சாஸ்த்ரீய சங்கீத தெரிய வேண்டும் - இந்தக் கருத்தில் எனக்கு உடன்பாடில்லை. பட்டறையில் பங்கேற்ற பலரும் ஒத்துக்கொள்ளவில்லை. எப்படி சங்கீதம் கற்கிறார் என்பதைவிட எப்படிப்பட்ட இசையைத் தருகிறார் என்பதே இசையமைப்பாளருக்கு முக்கியம் என்பது என் கருத்து. அதை எதிரொலிப்பது போல் "நம் அம்மா முறையாக சமையல் பயிலாமலே சமையல் கலை படித்த Chef களை விட நன்றாக சமைக்கிறார்களே?" என்று பார்வையாளர்களில் ஒருவர் கேள்வியெழுப்பினார்.
( ஆறுமுகம் அவர்கள், தற்போதைய இசையமைப்பாளர்களில் வித்தியாசகரே சாஸ்த்ரீய சங்கீதம் கற்றிருக்கிறார் அதனால் அவரே பிடிக்குமென்றார். ஆனால் பாமரனோ "சாதரண மக்களும் ரசிக்கும்படி இசையின் கதவுகளை எல்லோருக்கு திறந்து விட்ட இளையராஜா பிடிக்கும்" என்றார்).
4) தற்பொழுது இந்தி சினிமா மட்டுமே இந்திய சினிமாவாக வெளிநாடுகளில் காட்டப்படுகிறது.

பாமரன் அவர்கள் நேர்காணலை எடுத்துச் சென்ற விதம் மிக அருமை. காரணம், அவரின் நகைச்சுவை கலந்த பேச்சு.
உதாரணத்திற்கு, ஆறுமுகம் வயதானதால் தனக்கு இருதய அறுவை சிகிச்சை செய்யப்பட்டுள்ளது என்று கூறிய போது, "இந்தக் கால சினிமா பாடல்கள் கூட காரணமாயிருக்கலாம்" என்று கூற, அறையில் பலத்த சிரிப்பொலி .

இரண்டாவது நிகழ்ச்சி:
பேராசிரியர் ரமணியின் "பின் நவீனத்துவம் (Post-Modernism )" பற்றிய விரிவுரை. இதில் எனக்கு அறிமுகமில்லாததால் இதைப் பற்றி எழுதப்போவதில்லை. ஆனால் பேராசிரியரின் உரையின் நடுநடுவே கேள்விகளைக் கேட்டு என் அறியாமையை விளம்பரப்படுத்திக்கொண்டேன்.

மூன்றாவது நிகழ்ச்சி :
தமிழில் வலை பதிய பன்படும் மென்பொருள்களைப் பற்றிய முகுந்து அவர்கள் நடத்திய ஒரு அறிமுகப் படலம் (Training Demo). எ-கலப்பை உருவக்கியவர் இவர்தான். நான் எ-கலப்பையை தினமும் பயன்படுத்துவேன். அதை உருவாக்கியவரை சந்தித்ததில் மகிழ்ச்சி. எ-கலப்பை மென்பொருள் உருவாக எப்படி அவரும் அவருடைய "எறும்பு" குழுமத்தினரும் உழைத்தார்களென்றும், எ-கலப்பையில் இருக்கும் "Keyman" மென்பொருளிற்காக எப்படி பல தமிழ் ஆர்வலர்களிடமிருந்து 500 டாலர்கள் (1990களில்) திரட்டினார் என்றும் கூறினார்.
அவருக்கும் அவரோடு சேர்ந்து எ-கலப்பையை உருவாக்கிய அனைவருக்கும் நன்றி. பிறகு மா.சிவக்குமார் சில மென்பொருட்களைப் பற்றி விளக்கினார்.

பாலபாரதியிடம் நான் கேட்ட கேள்வி:
எனக்கு பட்டறை ஆரம்பித்தபொழுதிலிருந்தே இருந்த சந்தேகத்தை பாலபாரதியிடம் கேள்வியாகக் கேட்டேன்:
"இப்படிப்பட்ட பட்டறைகளை நிகழ்த்துவதன் மூலம் என்ன சாதிக்க நினைக்கிறீர்கள்?" அதற்கு பாலபாரதி இணையத்தில் இருக்கும் வலைப்பதிவர்களிடையே சமுதாயத்தைப் பற்றிய உரையாடலைத் துவக்கி வைக்க நினைப்பதாக கூறினார். மேலும் மா.சிவக்குமார், OpenSource Softwares மற்றும் இணையம் (Internet) ஆகியவை எப்படி சிறு சிறு தன்னார்வலர்களின் முயற்சியால் பெரிதாக வளர்ந்துள்ளதோ அது போல் இணையத்தில் உள்ள தமிழ் எழுத்தாளர்களும் மென்பொருள் நிபுணர்களும் இணையத்தில் தமிழ் வளர அவர்களால் முடிந்த பங்கை செய்ய வேண்டுமென்றார்.

(என் புரிதலில் ஏதேனும் தவறிருந்தால் திருத்தவும்)

இந்தப் பட்டறையை சிறப்பாக நடத்த உழைத்த அனைவருக்கும் எனது பாராட்டுக்கள்.

சில ஹைக்கூ கவிதைகள்

2007-05-11T07:13:00.000-07:00

மக்களே வணக்கம் வணக்கம் !
இங்கன வந்து ஒரு ஸ்மால் (small) அடிச்சுட்டுப் போங்க.
ஹிஹி என்னுடைய குட்டி ஹைக்கூ கவிதைகளத்தான் ஸ்மாலுன்னு சொன்னேன்...

1)
காலத்தோடு இணைந்து நடக்க
நொடிக்கு நொடி துடிக்கும் காதலன்
கடிகாரம்

2)
இதழே திறக்காமல்
கவிதை சொல்கிறாள்
புன்னகை

3)
சோம்பலின் களையா? சோகத்தின் முள்ளா?
காட்டும் கண்ணாடிக்குத் தெரியவில்லை
தாடி

4)
தமிழன் பொய் வெளிச்சத்தில்
தேர்ந்தெடுக்கிறான் தலைவர்களை
சினிமா

5)
நடக்காத ஏக்கங்கள் எழுந்து
தூக்கத்தில் நடக்கின்றன
கனவு

இனிய புத்தாண்டு வாழ்த்துக்கள்

2007-04-13T06:46:00.000-07:00

நண்பர்களே !
எல்லோருக்கும் எனது இனிய தமிழ்ப்புத்தாண்டு வாழ்த்துக்கள் !!!
---

கணிணி தட்டி
கண் சோர்ந்த நேரத்தில்
புத்தாண்டு வாழ்த்து சொல்லி
வந்தது ஒரு மின்-மடல்

ஜனவரி, பிப்ரவரி என்று
யோசித்துப் பழகிவிட்ட மனதில்
கண நேரக் குழப்பம்

சித்திரை, வைகாசி என்பவை
மறந்து போயின வேற்று ஊரில்!
தமிழ்ப்புத்தாண்டு என்பது
சொல்லித்தெரிய வேண்டிய நிலை

என்ன தேடிக்கொண்டிருக்கிறேன் இந்த பெங்களூரில்?

-------

நண்பர் ஒருவர் அழகான மின்-மடல் அனுப்பினார். அது உங்களுக்காக இங்கே...

Chithirai veyil Cricket

Etti Pidikum kuzathai Manasu

Thairiyamana vazhkai

Pootipodum manam

Uzhaika Therinthavargal

Athai pirarukku kodukka therinthavargal

Entha Iyenar Sami Arulla Nalla Erukkanum

Iniya Tamiz Puthandu Nal Vazthukal !!
இனிய புத்தாண்டு வாழ்த்துக்கள்

விஜயகாந்தின் திரையுலக குரு

2007-04-02T06:07:00.000-07:00

இன்னிக்கு வந்த மின்னஞ்சல்ல விஜயகாந்தின் திரையுலக குரு யாருங்கற ரகசியம் எனக்கு தெரிஞ்சுது. நீங்களும் பாருங்க...

இந்த தெலுங்கு ஹீரோ பேரு "பாலையா".
(அண்ணன் "வெட்டிப்பயலுக்கு" இந்தப் பதிவு சமர்ப்பணம் :)) ).
இந்திய அரசு, ரயில் வண்டிகளுக்கு டீசல் இனி போடப்போவதில்லை என்றும், எந்த ரயிலாவது கிளம்பனும்னா அண்ணன் "பாலையா" வைக் கூப்பிடப் போவதாகவும் அறிவித்துள்ளது.

கிரிக்கெட் - குட்டி கவுஜ!

2007-03-19T05:28:00.000-07:00

சும்மா வேலை வெட்டி இல்லாம கொஞ்ச நேரம் கிடைச்சா, நீங்க என்ன பண்ணுவீங்க?
என்னாது... உருப்பிடியா ஏதாவது செய்வீங்களா? அப்போ தப்பான எடத்துக்கு வந்திருக்கீங்க. நான் என்ன செஞ்சிருக்கேன்னு பாருங்க:

கிரிக்கெட் - சில ஹைக்கூ கவிதைகள்
-------------------------------

1) அவன் ஒற்றைவிரலசைவை
உலகமே எதிர்பார்க்கும்
அம்பயர்
---

2) ஜெயிப்பது அவனா இவனா ?
"இருவருமில்லை, நான்தான்"
என்று தடையாய் வரும்
மழை
---

3) தோற்கப்போகும் அணிக்கே வெற்றி
கைகொடுப்பது கடவுளல்ல
டக்வர்த் லூவிஸ்*
---

4) ஸ்லெட்ஜிங்** கூத்தாடினாலும்
வெற்றியில் கண்
ஆஸ்திரேலியா
---

5) இந்திய அணிக்கு
வெற்றி மேல் வெற்றி
விளம்பரங்களில்
---

6) வேலி தாண்டல்தான்
ஆனாலும் வரவேற்கப்படுகிறது
சிக்ஸர்
---

*duckworth lewis
** Sledging

(நேரங்கெட்ட நேரத்தில மாட்ச் பார்த்து தூக்கம் போய், பாதி கிறக்கதுல உட்கார்ந்திருந்த நேரத்தில எழுதினது :)) )

தோழிக்கு சில வரிகள்...

2007-03-16T08:11:00.000-07:00

முதுகெலும்பில்லாதவன் ஓடி மறைந்துவிட்டான்
உறவுகள் இறுக்கியதில் உலர்ந்துவிட்டான்
நம்பிய நீ திகைத்தது உண்மைதான்
ஆனால்
புதுக்கவிதை நீ புதைந்தா போனாய்?
புரட்சிக்கவிதையாக அல்லவா மலர்ந்தாய்

காயம் சுமக்கும் உனக்கு சொல்ல
வார்த்தைகள் ஏதும் என்னிடம் இல்லை
இந்த வரிகள் மருந்தாகிடும் என்று
நான் எண்ணவும் இல்லை

காலம் ஆற்றியக் காயங்களில்
ஒன்றாகிப் போகும் இதுவும்
அதுவரை, எல்லாம் தாங்கி
சுற்றி வளைக்கும் சோகக்கூட்டை உடைத்து
சிறகுகள் வளர்த்து
சீக்கிரம் பட்டாம்பூச்சியாகிடு என் தோழி...

6. சுட்ட படம், சுடாத கவிதை - 3

2007-03-13T04:57:00.000-07:00

படம்/கவிதை பெரிதாக தெரிய, படத்தை கிளிக் செய்யவும்
"சுட்ட படம், சுடாத கவிதை-1" படிக்க இங்கே கிளிக்கவும்.
"சுட்ட படம், சுடாத கவிதை-2" படிக்க இங்கே கிளிக்கவும்.

5. சுட்ட படம், சுடாத கவிதை - 2

2007-03-07T20:38:00.000-08:00

(படம் பெரிதாக தெரிய, படத்தை கிளிக் செய்யவும்)

"சுட்ட படம், சுடாத கவிதை-1" படிக்க இங்கே கிளிக்கவும்.

பிடிச்சிருந்தா ஒரு வார்த்தை சொல்லிட்டு போங்க !!!

4. சுட்ட படம், சுடாத கவிதை

2007-03-07T06:38:00.000-08:00

சுட்ட படம், சுடாத கவிதை - 1
(படம் பெரிதாக தெரிய, படத்தை கிளிக் செய்யவும்.
Click on the pic to see clearly)

ஏன்?

2007-02-11T02:29:00.001-08:00

பூக்கள் கேட்டேன் போதிமரம் தந்தாள்...

யாதும் ஊரே யாவரும் கேளிர்

2007-02-11T02:27:00.001-08:00

(எனக்கு மிகவும் பிடித்த தமிழ் பாடல்)

யாதும் ஊரே; யாவரும் கேளிர்;
தீதும் நன்றும் பிறர்தர வாரா;
நோதலும் தணிதலும் அவற்றோ ரன்ன;
சாதலும் புதுவது அன்றே; வாழ்தல்
இனிதுஎன மகிழ்ந்தன்றும் இலமே; முனிவின்,
இன்னா தென்றலும் இலமே; ‘மின்னொடு
வானம் தண்துளி தலைஇ, ஆனாது
கல்பொருது இரங்கும் மல்லற் பேர்யாற்று
நீர்வழிப் படூஉம் புணைபோல, ஆருயிர்
முறைவழிப் படூஉம்’ என்பது திறவோர்
காட்சியின் தெளிந்தனம் ஆகலின், மாட்சியின்
பெரியோரை வியத்தலும் இலமே;
சிறியோரை இகழ்தல் அதனினும் இலமே.

பண்டமாற்று

2007-02-11T02:25:00.000-08:00

தமிழ்த் தறியில் வரிகள் நெய்து தருகிறேன்
படித்துவிட்டு புன்னகை தாருங்கள் !